إيمان السيد وياسر الطوبجي .. نجوم قناة موجه كوميدي

في المقالة دي حنتكلم عن إثنين من الممثلين الي بجد يعتبروا من افضل الكوميديانات على الساحه في وجهة نظري، واللي بدأ ظهورهم في اسكتشات Talk Show على قناة موجه كوميدي اللي بدأت في ٢٠٠٨ (ودي يتعملها لها مقالة لوحدها)

الاثنين كانوا الأبطال الرئيسيين، بجانب مجموعة من المواهب اللي بجد كل واحد فيهم كان ممكن يبقى نجم لوحده…. بيقلدوا فيها فنانين ومذيعين وبرامج التلفزيون القديمة والأفلام .. وكانت ومازالت فكره بره الصندوق، ظهر بعدها بفتره كبيره Saturday night بالعربي اللي كان ممول بشكل أفضل بكثير .. لكن بالنسبالي talk show هو الأفضل لكن لازمه سوء الحظ بسبب الظروف الإنتاجية، وتقليدهم لبعض المذيعات والفنانات، اللي اعتقد سببلهم مشاكل، وكان من ضمن الاسباب في اغلاق القناة وبيعها بعد كده

موهبة إيمان وياسر واضحة في الاسكتشات دي، وده لأن الاثنين من وجهة نظري من الفنانين اللي محتاجين يبقوا مرتاحين في اللوكشن ومع التيم الصح عشان يبدعوا ويطلعوا احسن ما عندهم

ياسر الطوبجي ياسر الطوبجي – Yasser Eltobgy

بيستخدم الكوميديا الهادية من غير أي افتعال أو صوت عالي أو حركات أو ملابس مبالغ فيها، ودي أصعب أنواع الكوميديا.. بحي ماجد و شيكو على استعانتهم بيه في مسلسل اللعبة في دور الدكتور النفسي لشيماء .. اللي من خلاله أخد قاعدة شعبية أكبر عند الناس، خاصة بعد ظهوره في مسلسل 100 وش في حلقة المغترب في دولة عربية اللي بيدور على عروسه وكان متألق فيها جداً. يمكن ناس كتير ماتعرفش إن ياسر حالياً مدير المسرح الكوميدي بقطاع الانتاج الثقافي

نيجي بقى لقنبلة الكوميديا إيمان السيد – eman elsayed

واللي بعتبرها نسخة الألفية الجديدة من زينات صدقي، وانا شخصيا من اشد المعجبين بيها، كانت ال vedette بتاعت المجموعة في اسكتشات ال Talk show، بأداء مميز جدآ جداً … وأعتقد انها لو ظبطت تون الصوت زي ما كانت في الاسكتشات .. حتقدر تطلع من إطار الأدوار المحصورة فيها حالياً، لقماشة أدوار أكبر بكتير .. لانها بجد عندها الموهبة وخفة الدم الرباني .. اللي يخليها تتصدر نجمات الكوميديا.