فيلم بطل من ورق
من أحلى الافلام المصرية والقليله جداً من هذه النوعية.. فهو كوميديا وجريمة ومجرم سايكو .. والنوعية دي بالإخراج ده، نادراً ما بنشوفها في الأفلام المصرية
وواحد من الأفلام اللي لسه معلمه مع الناس لغاية دلوقتي .. بافيهات “مبيعرفش يوجفها”، “حنموت كلنا”، “يا سنة سوخه ياولاد”،”لاااا بلاش شوجى شوجى لاااا “،”سوسن ياااا سووووووسن”
وطبعاً “ممدوح عبد العليم” في دور “رامي قشوع”.. اللي أبدع في دور القروي الساذج.. بلكنته وأداؤه ..مع سيناريو وإخراج رائع.. والاختيار الجيد لباقي الكاست، في دور الظابط “صلاح قابيل” ،المجرم السايكو” أحمد بدير” و الصحفية المرووشه” آثار الحكيم” واللي كان بيعتبرهم الناس هي و”ممدوح” من الثنائيات الناجحه في الفترة دي.
ده غير الموسيقى التصويرية بتاعته للفنان “حسن أبو السعود” ، اضفت جو من الكوميديا حتى لو مفيش كلام في المشهد، وأعتقد أي حد شاف الفيلم وبيقرأ البوست حاتيجي الموسيقى في ذهنه تلقائياً.
قصة الفيلم بدون حرق .. وأرشحه بشده للي لسه ماشافهوش .. لأن مينفعش تكون مشفتش الفيلم ده
أحد الكتاب المغمورين “رامي قشوع” بيفاجأ زي ناس كثير في البلد بجرائم غريبه من نوعها على الشارع المصري عماله تحصل، لكنه بيتصدم لما يلاقي الجرائم دي .. هي نفسها المذكوره في إحدى رواياته .. ورغم إبلاغه للسلطات محدش حايصدقه.. لكن عن طريق الصدفه بيقابل الصحفية “سوسن” عشان تشبط في أي خبر ممكن يفرقع معاها .. وتبقى صحفيه مشهوره.. فبتلازمه طول الوقت، لغاية ما يوصلوا للمجرم “سمير،.. وتستمر الأحداث.
فيلم بطل من ورق
النوع: كوميدي- إثاره- جريمة
بطولة: ممدوح عبد العليم-آثار الحكيم-صلاح قابيل-احمد بدير
إنتاج: 1988
