فيلم الأيام الثلاثة القادمة The Next Three Days
واحد من الأفلام الجميلة اللي مش معروفه اوي، فيلم الأيام الثلاثة القادمة The Next Three Days، فيه دفئ عائلي مع ساسبينس .. ويكفي أنه بطولة واحد من الممثلين المفضلين للكثيرين.. “راسل كرو Russell Crowe”
أداؤه ناعم وسلس وطبيعي دائماً .. ده غير صوته الفخم المميز .. أنا كفويس أوفر بيجذب نظري دايماً الصوت القوي المعبر ..
وبالفعل تم استخدامه كراوي في بعض الأفلام والوثائقيات.. فاستخدمته استراليا لعمل سلسله من الوثائقيات عن الحياة البحرية Australia’s Great Barrier Reef،
لكنه للأسف مكنش اد توقعاتي .. فمنتشرش في الجزئية دي .. مقارنه بـ”مورجان فريمان” مثلاً اللي امتهن التعليق الصوتي بجانب التمثيل.
نرجع للفيلم بتاعنا.. هو النسخة الامريكية من الفيلم الفرنسي “Pour Elle” انتاج عام 2008، واللي كان مبني عن قصة حقيقية لإمرأة فرنسية أدينت بقتل رئيسها، أخرجها زوجها من السجن وهربوا لأمريكا الجنوبية.
من إسم الفيلم، حتكون الأحداث في الثلاث أيام اللي بعد ما ادينت خطأً زوجة البطل في جريمة قتل؛ ومحاولاته في إنقاذها .
الفيلم بيشدك ليه .. ويخليك حاسس بمشاعر البطل طول الوقت .. ازاي رجل عادي .. بيحاول يحمي مراته وأسرته.. فبيعمل حاجات عمره ما تخيل إنه ممكن يعملها؛ بيوصل مشاعر الأمان والحب والموده اللي بين أي اثنين، من غير كليشهات كلام الحب المعروفه؛وإن العشره والمواقف هي الحقيقة الجميلة بين أي اثنين.
فيلم الأيام الثلاثة القادمة The Next Three Days
بطولة: Russell Crowe – Elizabeth Banks -Liam Neeson
نوع الفيلم: إثاره- دراما – جريمة
تقيم IMDb 7.3
إصدار: 2010
