” الفريد هيتشكوك ” ملك السبنس

جه في بالك مره مين اول واحد عمل افلام رعب وسسبنس ؟
هو واحد من أهم وأعظم رواد مخرجي افلام السبنس والاثاره والجريمة على الإطلاق

سير ” الفريد هيتشكوك”، واللي لقب بـ (ملك السبنس “Master of Suspense”)، و واحد من اكثر الشخصيات تأثيراً في تاريخ السينما.
يعتبر هو أول من عمل افلام رعب ..خاصة الرعب النفسي اللي ظهر بوضوح في فيلم سايكو Psycho.. واحد من أهم وأشهر أفلام الرعب والسيكوباتيه.. كونه الأول من هذه النوعية.. ده غير ان حبكته والمفاجاة آخر الفيلم .. حتخليك تنبهر بجد من العظمة .

على مدار 6 عقود بداية من الاربعينيات، أخرج كوك، أكثر من 50 فيلم، كثير منها بيتم مشاهدتها لغاية دلوقتي، ده غير أن أعماله بتدرس في معاهد والكليات المتخصصة، ففي أسلوب إخراج باسمه، Hitchcockian” style” كونه هو أول من استخدمه، بتحريك الكاميرا بنفس حركة عين البطل، لتقليد نظرة الشخص، وبالتالي تحويل المشاهدين إلى متلصصين ، ده غير تأطير اللقطات، عشان يزود حالة القلق والخوف عند المشاهد.

أعمال هيتشكوك كلها تعتمد على الإثارة والغموض غالباً بتكون جريمة غامضة، تنتهي آخر الفيلم بمفاجاة لما تعرف مين مرتكب الجريمة والبعض الآخر مقتبس من روايات.

يقال أن السبب في تميزه واتجاهه لهذه النوعيه من الافلام، هو طفولته المعقده خاصة علاقته بوالده.. اللي أرسله أحد المرات لصديقه ظابط الشرطة، عشان يحبسه لبضع دقائق في القسم، كعقاب ليه عشان شقاوته. مما تسبب في عقدته من الاماكن المغلقة وحاجات تانيه ظهر تاثيرها في افلامه. ويقال ان خلفيته وبعض مشاكله النفسية واهتمامه بالنساء كان ليها بعض الأثر في طريقة اخراجه.

بخلاف أسلوب الإخراج المعروف باسمه، هيتشكوك ليه بصمة واضحة جدا في طريقة إخراجه، ده غير انه كمان محب للظهور والشهره .. فكان دائم التواجد مع الفنانين .. و عمل لقاءات كثير وده مكنش منتشر في الفتره دي بالنسبة للمخرجين.

من الحاجات اللي ميزته كمان وعرفته للجمهور ، انه كان بيحب يظهر في أفلامه، بما يعرف بـ cameo roles ، فظهر في 40 فيلم من ال 53 اللي اخرجهم، بيظهر فيهم في مشاهد قصيره صامته، ذي ركوب الباص، المرور أمام عماره، أو حتى ظهوره في صوره في جرنال في لقطة في الفيلم ( مع المجاميع يعني )

معروف عنه كمان أنه بيحب الممثلات الشقروات، ومثل معاه العديد من مشاهير الممثلين ذي كاري جرانت (4 افلام)، إنجريد بيرجمان ( 3 أفلام) ، جيمس ستيوارت (4 افلام)، وثلاث مرات متتالية مع جريس كيلي.

عرف أيضآً هتشكوك ببدانته، واللي استخدمت في التعريف عنه كايقونه Logo استخدمت في بداية برنامجه التلفزيوني وافلامه.

الحقيقه ان الكلام عنه مش حيوفيه حقه، يكفي أنه نعرف ان في عام 2012، فيلم الإثارة النفسية Vertigo اللي أخرجه هيتشكوك ، بطولة ستيوارت، ازاح فيلم Orson Welles ‘Citizen Kane (1941) باعتباره أعظم فيلم قدمه معهد الفيلم البريطاني على الإطلاق، استنادًا لاستطلاع الرأي اللي تم أجراءه على مستوى العالم لمئات من نقاد الأفلام.

واعتبارًا من عام 2021 ، تم اختيار تسعة من أفلامه للحفظ في السجل الوطني للسينما بالولايات المتحدة، بما فيهم الفيلم المفضل له شخصياً، ظل الشك Shadow of a Doubt (1943).

و حصل على زمالة BAFTA في عام 1971، و AFI جائزة Life Achievement في عام 1979 ، وتم منحه لقب سير في ديسمبر 1979، قبل وفاته بأربع شهور، في 29 أبريل 1980.

يمكن البعض مايكونش فاكره هو شخصياً، لكن أعتقد بمجرد ذكر فيلم Psycho، الكثير منكوا حايعرف الفيلم …هو أبيض وأسود ولكنه بيعتبر أيقونة للأفلام النفسية حتى الان.

ويمكن المتابعين القدامى لبرنامج “نادي السينما” حايفتكروا مشهد فيلم The Birds اللي بيظهر في مقدمة البرنامج الشهير.
الفريد هيتشكوك كان بيعمل حلقات تلفزيونية سميت بإسمه ” الفريد هيتشكوك يقدم” Alfred Hitchcock Presents

هي سلسلة مختارات تلفزيونية أمريكية أنشأها واستضافها وأنتجها ألفريد هيتشكوك ، وتم بثها على CBS و NBC. تتميز بمسلسلات درامية وإثارة وألغاز (حلقات منفصله)، بعد كده تم تغيير اسمها إلى ساعة ألفريد هيتشكوك، أخرج هيتشكوك منها 18 حلقة فقط .
الحلقات دي بيظهر فيها في أول أو آخر الحلقة بيعلق عليها.. وأنا شخصياً شفت بعضها زمان… مميزه جدا جدا..(برشحها بشده).

طبعا العديد من الافلام تم إعادة انتاجها وساعات بأسماء تانية غير الفيلم الاصلي..
احد المفاجاءات بالنسبالي كان فيلم Rope الماخوذ عن مسرحية بنفس الاسم لباتريك هاميلتون. لاني شفت النسخة العربي منه الاول، في شكل مسرحية باسم “التابوت” THE COFFIN لفريق شغف – Passion team، واللي بجد باعتبرها افضل عمل مسرحي لفرق الشباب شفته حتى الان، وفي راي كان افضل من فيلم هتشكوك عن جداره، وبنشادهم من خلال صفحة حدوتة ع النوتة، يرجعوا يقدموا العرض تاني .

المفاجاءه التانية، انه بيخرج كوميدي فيلم Mr. & Mrs. Smith واللي اتعمل بعد كده مسلسل وفيلم من بطولة “براد بيت” و”انجيلينا جولي”. والمفاجاءه الثالثة، ان كثير من افلامه القديمة الابيض ولأسود، الموسيقى بتاعتها هي الموسيقى المستخدمة في نص الأفلام المصرية القديمة تقريباً، وفي عديد من المقالات حنكتب عن بعض من كلاسيكيات “هتشكوك”، اول ما تشوفهم وتسمع موسيقى الفيلم حتعرفهم بالتأكيد.

حاسيبكوا مع قائمة من أهم وأعظم أفلام السابينس والجريمة والغموض .. أتمنى انها تعجبكوا برشحلكوا تبتدوا بأول 3 منهم

• Rear Window
• The Birds
• Psycho
• Rope
• Vertigo
• The 39 Steps
• The Man Who Knew Too Much
• Mr. & Mrs. Smith وغيرهم كثير..

*الفريد هيتشكوك : مخرج (1899-1980)
تصنيف الأفلام: متنوعه ما بين ( سسبنس / جريمة/غموض/رعب/ جنس)
حصدت 6 من أفلامه الأوسكار بجانب 46 ترشيحًا ، ولم يفز أبدًا بجائزة أفضل مخرج على الرغم من ترشحه لها خمسة ترشيحات
53 فيلم ظهر في 40 منهم
انتج 30 كتاب