فيلم نهر الخوف
هل الموسيقى التصويريه او الاغنية ممكن تكون سبب في نجاح فيلم؟
ولا الفيلم هو اللي بيكون سبب شهرة وانتشار موسيقى او أغنيه؟
نقدر نقول إن الحالتين صح، والعمل الدرامي المميز والناجح بيكون متكامل في كل أطرافه، وكل عنصر بيدعم الآخر، ومفيش كلام ان اختيار موسيقى الموسيقار الأسطوره “عمر خيرت” لأي عمل فني، بيكون أحد العوامل الرئيسية في نجاحه وشهرته.
فيلم ” نهر الخوف” أحد الأفلام المميزه جداً للفنان المحبوب ” محمود عبد العزيز”، واللي للأسف مش معروف للكثير، بالرغم من أنه من أفضل أعماله كأداء تمثيلي، ويمكن كمان الموسيقار “عمر خيرت” مش بيعزف الموسيقى بتاعته كثير
بتدور أحداث الفيلم، عن الشاب عبد الرحمن وصديقه عادل، اللي بيتم الاشتباه فيهم بالخطاْ، ويلاقوا مواصافتهم منشوره في الجريده الرسمية على أنهم مرتكبي جريمة قتل
ونتيجه لخوفهم، بيحاولوا يهربوا للابتعاد عن الانظار، وهمه راكبين “الاتوبيس النهري”، بيصادف ركوب أحد ظباط الشرطه، ليعتقد عبد الرحمن أنه قادم للقبض عليهم.. فيقوم بخطف سلاح رجل الأمن ، ليتحول مسار الأحداث ويتورط هو وصديقه في جريمة اختطاف رهائن “الاتوبيس النهري”
الفيلم مميز كإخراج وتصوير، خاصة بامكانات فتره الثمانينيات، وهو الأول أو الوحيد من نوعه أعتقد اللي اتصور في “الأتوبيس النهري”
الفيلم فيه اسقاطات سياسية كثير، ويعتبر من أحسن أدوار الفنان “محمود عبد العزيز” اللي بينتقل فيها، ما بين الدراما والإيفيهات الكوميديه البسيطه بكل سهوله وبراعه .. وطبعاً مش حتكلم عن الموسيقى، يكفي ذكر “عمر خيرت”
على اليوتيوب حتلاقوا اعلان الفيلم
، اللي بردوا يعتبر مختلف وفكرته مبتكره، يمكن بردو لغاية دلوقتي مشفنهاش اتكررت تاني، بيتكلم فيه فنانين العمل مع الجمهور، عن ايه اللي بيخوفهم في حياتهم الشخصية. يمكنك مشاهدة التريلير من هنا
فيلم نهر الخوف
تصنيف الفيلم : اثارة- دراما – كوميدي (سوداء)
بطولة : محمود عبد العزيز – أحمد راتب – صلاح قبيل – نورا – عبله كامل
تاريخ الاصدار: : 1988
تصوير : طارق التلمساني
اخراج : محمد ابو سيف
