مسلسل مطلوب عروسه

عايز عروسه ؟؟

عايز عروسه على المقاس.. عنيها خضرا بشعر اصفر
متكنش وش بهدله .. عنيها خضرا بشعر اصفر

واحد من احلى وامتع المسلسلات الكوميدية على الاطلاق، مسلسل “مطلوب عروسه”، بطولة الدكاتره “ناصف سند أبوالفضل” 3 ماجستير و 2 دكتوراه ، وصديقه المليونير “محمود” عنده رصيد فلوس كثير.. جوه البنوك متلتله

بتدور القصه عن اثنين شباب، ضربهم السلك ، بيدورو على عروسه بمواصفات خاصه جدا جدا ..مواصفات سطحيه طبعا، واحد عايز عالمه تناسب عقليته العلميه المعمليه الفذه، والتاني عايز واحده جميله ومن عائله كبيره وطبعا عينها خضرا وشعرها اصفر اصلي

وهنا تظهر الخطبه “أم شلبي” تستغل طموحاتهم اللي اكبر من قدراتهم وتستغلهم اسوأ استغلال☻️. وسخرية القدر ان في اثنين بالفعل بيحبوهم وبيحاول يلفتوا نظرهم لكن تقول لمين

المسلسل 12 حلقة .. بس ولا اروع، كل حلقة بتظهر عروسه جديده للاثنين، وطبعاً مش بتنفع الجوازه، بمجموعه مواقف كوميدية مسخرة السنين. من احلى الحلقات.. حلقة العروسه راندا والعروسة عائشه الكيلاني

المسلسل بطولة احمد بدير ويونس شلبي الله يرحمه. اللي مجرد ظهوره وطريقة كلامه حتخليك تموت من الضحك. ورغم انه مسلسل كوميدي، لكن في رساله وحكمه .. اي والله وهو ان اختيار شريك الحياة مش بالشكل او الوجاهه الاجتماعية.

مسلسل مطلوب عروسه
بطولة: يونس شلبي -أحمد بدير- نادية عزت – نهي العمروسي – دينا عبد الله – لمياء الجداوي-عائشة الكيلاني
سنة العرض: 1990
قصة سيناريو و حوار: محسن الجلاد
إخراج: محمد أباظة