فيلم الأمير الصغير The Little Prince 2015

واحد من أحلى أفلام الكرتون اللي ممكن تشوفها، واللي أعتقد حايعجب الكثيرين .. خصوصا إنه موجهه للكبار مش الصغار >>

بتدور قصة الفيلم عن فتاه صغيره عايشة مع مامتها ذات الشخصية العملية، مخططه ليها كل دقيقه وساعة وسنة في حياتها،

في سعيهم ان البنت تدخل أكاديمية تعليمية كبيره .. بيعزلوا عشان يبقوا في النطاق السكني عشان تتقبل البنت، بعد ما تم رفضها في الإنترفيو الأول، وعشان المنطقة غالية.. فمش بتلاقي غير بيت سعره بسيط لأن فيه عيب عجيب..

وهو جارهم الراجل العجوز ببيته واسلوبه الغريب ..

لكن بتتكون صداقة بينه وبين البنت .. وبيحكلها قصة الأمير الصغير اللي بيقوم برحلة فوق الخيال بكثير

فيلم الأمير الصغير .. هو فيلم انيميشن مقتبس من رواية بنفس الاسم للكاتب الفرنسي “أنطوان دو سانت”، وتعتبر الرواية من أشهر قصص أدب الأطفال في العالم.. واعتبر تاني اكثر كتاب ترجم للعديد من اللغات( 400 ترجمة)، واتعمل كذا فيلم ومسلسل، ومسرح غنائي لكن دي النسخه الأطول والأفضل والأكثر شهره للرواية.

“أنطوان” كاتب وطيار فرنسي وهو مؤلف الرواية؛ ولد عام ١٩٠٠ وتوفي في إحدي المهمات الاستطلاعية في الحرب العالمية الثانية عام ١٩٤٤.

وكتب ههذ القصة الرائعة بفانتازيا رقيقة، بتاخطب الطفل اللي جواك، وبتوصل فكرة مهمه، هو إنك متنساش أبدا الطفل الي جواك، فهو نجم وقلب ووردة الحياه..

وافتكر التشبيهات دي عشان حتلاقيها في الفيلم

وان انغماسك في الحياة المادية ومفرمة الحياة ..، مش هي الحياة الحلوه اللي بنعتقد في بعض الأوقات ان هي دي احتياجاتنا الأساسية Essentials، واللي كان بيذكرها الرجل الثري اللي بيجمع الكنوز أو بيذكرها مدير المدرسة.

الأمير الصغير .. هو الإنطلاق ..المرح ..روح الاكتشاف …التأمل في الطبيعة، الهواية ومتعة الصحبة وتكوين الصدقات، هو الفطره البسيطة اللي بتكون موجوده جواك من وأنت طفل، لكن بتدفن بحدود ومعايير محطوطة من المجتمع والناس حواليك .. واللي صورها الفيلم بشكل عالم غامق ألوانه كلها رمادية

الفيلم فلسفي بيخاطب الكبار مش الصغيرين بصوت “جيف بريدجز” ومجموعة من مشاهير الفنانين، ودمج ما بين تقنية الجرافيك ثنائي الأبعاد و الستوب موشن stop motion animation، واعتقد ان مش أقل من 18 سنة ممكن يستوعب الرسايل اللي جوه الفيلم.

وعشان تعرف أكثر عن روعة وبراعة الكاتب .. حتلاقي الكاتب في مستهل قصته بببتدي بإهداء من أجمل الإهداءات اللي ممكن تقرأتها ..

رواية اﻷمير الصغير (1943م)
——
إلى ليون ويرث أقدم للأطفال اعتذاري إذ أُهدي هذا الكتاب لشخص راشد، ولَديّ في ذلك عذر معقول.. فهذا الراشد هو أعز صديق لي على هذه البسيطة، ولي عذر غيره هذا الراشد يستطيع فهم كل شيء ، بما في ذلك كتب الأطفال.

ثم لدي عذر ثالث : وهو أن هذا الشخص يقطن بفرنسا حيث يقاسي الجوع والبرد ، ويحتاج للمواساة.

فإذا كانت كل هذه الأعذار غير كافية ، فإني أهدي هذا الكتاب للطفل الذي كانه ذلك الراشد فكل الراشدين سبق وأن كانوا أطفالا رغم أن قلة منهم فقط تتذكر ذلك!
فالأصوب إذن إهدائي..

إلى ليون ويرث لمّا كان ولدا صغيرا
——

في عام ٢٠١٥ وبدعم من مؤسسة أنطوان دو سانت إكزوبيري، تم إطلاق رواية الأمير الصغير على طريقة برايل. والتي تم إعادة نشرها بواسطة كفيف يدعى Claude garrandes.

الفيلم تم عرضه في إفتتاح مهرجان “كان” خارج المنافسة عام 2015، وفاز بـ 7 جوائز ورشح لـ 15

واعتبر ظاهرة غير مسبوقة في عالم ادب الطفال، حيث باع اكثر من 200 مليون نسخه واتعمل ليه مدينة ترفيهية theme park في فرنسا، متجر لبيع المنتجات الخاصة بالفيلم والرواية في فرنسا، ومتحف في اليابان، وقرية محاكاه في كوريا، والعديد من المعارض و عروض VR على مستوى العالم .. شاهد الفيديو

فيلم الأمير الصغير The Little Prince
الكاتب : أنطوان دو سانت إكزوبيري
اخراج : مارك أوزبورن
اصوات: جيف بريدجز، وجيمس فرانكو، وراشيل ماك آدامز، وبول رود، وبود كورت، وماريون كوتيار، وبينيشيو ديل تورو، ، وريكي جيرفيه، وبول جياماتي، ورايلي أوزبورن، وألبرت بروكس وماكينزي فوي
النوع : فانتازيا – مغامره – انميشن
انتاج: 2015 هذه النسخة هي اطول فيلم انميشن مقتبس من القصة الأصلية
تصنيفه على imdb 7.6
تصنيف حدوتة ع النوتة 8