مسلسل ذكريات قصر الحمراء Memories of Alhambra
وكعادة الدراما الكورية .. تأتي بكل جديد..
الناس كلها عندها قلق وترقب لشكل العالم بظهور الذكاء الأصطناعي وألعاب الواقع المعزز (AR (Augmented reality، عشان نلاقي مسلسل ذكريات قصر الحمراء بيتناول تأثير ألعاب الواقع المعزز على حياتنا، وطبعاً بشكل فانتازيا ولا أروع.
بتدور قصة مسلسل ذكريات قصر الحمراء عن فكره تطبيق استخدام ألعاب تكنولوجيا الواقع المعزز Augmented Reality AR، وإزاي ممكن تتحول من مجرد game إلى واقع حقيقي عايشه كله يوم .
بتبتدي قصة المسلسل عن شاب مطور لألعاب الفيديو، بيحاول هو وصديقه بيع لعبة “قصر الحمراء” لكبرى الشركات في هذا المجال، ولكن فجأة حنلاقي هذا الشاب مُطـارد، وأثناء هـروبه بيتصل بشخص في مكالمه غامضة، ملخصها أنا بعتلك لينك وعشان نتقابل، روح موتيل “بونيتا” في غرناطة في أسبانيا، وبيقفل الخط.. ويختفى.
صاحب أحد كبرى شركات الألعاب “Yoo Jin” على الطرف الآخر من المكالمة، حيكتشف، أن اللينك ده للعبة الواقع المعزز “قصر الحمراء” اللي برمجها الولد، وهي مصممه ومنفذه بشكل عبقري، فبيسافر بالفعل عشان يقابله، وبمجرد وصوله حيبتدي يلعب باللعبة، أو بالأصح اللعبة هي اللي حاتلعب بيه.
فبمجرد تسجيل دخوله للعب، مش حيعرف يخرج منها تاني؛ و حتنقلب حياته رأسا ً على عقب، فحيخسر حياته وأصحابه وشغله، فاللعبة حتبقى هي الواقع اللي عايشه طول الوقت، وحيبقى هو كمان مطارد !!
يا ترى حيعرف يخرج من اللعبة .. ويعيش حياته الطبيعيه من تاني ؟!
المسلسل حيشدك من أول لحظة خاصة اول ٨ حلقات، الفكره مستخدمتش كثير، والمسلسل جسدها بشكل يكاد يكون تصور ممتاز وواقعي، وازاي ممكن أن تكون عليه جودة تلك النوعية من الألعاب في المستقبل، لكن طبعاً من غير الحبكة الفنية الموجوده في الدراما.
من ضمن عناصر التشويق في المسلسل هو فكرة استخدامه لقصر الحمراء في غرناطة باسبانيا، وهو حاجه طبعاً بتجذبنا احنا دول الشرق الأوسط الإسلامية، فهو واحد من أهم المعالم السياحية بأسبانيا اللي بيرجع تاريخها لفترة الحكم الإسلامي للأندلس.
الحقيقه أن من ضمن مراحل levels اللعبة، هو الجمع بين مفتاح الجنة ويد السيدة فاطمة رضي الله عنها. وده حنعرفه من حوار بيدور ما بين البطل والبطله في محاولتهم لفهم لغز اللعبة.
للأسف أنا شخصياً مكنش عندي خلفيه عن القصة دي، لكن المسلسل خلاني أبحث وأدور عن صدق هذه الروايه..
هو بالفعل على بوابة العداله (أحد بوابات القصر الحقيقي) صوره لكف يقال انه يرمز الى يد يطلق عليها “يد فاطمة”، وفقاً لتفسيرات بعض المؤرخين والمستشرقين، وللأسف مفيش معلومات كثير عن الموضوع ده، غير المذكوره باختصار واللي ذكرها المسلسل.
و الأسوأ إني مع البحث اكتشفت ان مصطلح “يد فاطمة” يطلق على الكف الأزرق اللي بداخله العين لتجنب الحسد. تخيلوا إن بدعة ذي دي هي معروفه لغير المسلمين في الغرب بالمصطلح ده ومفيش أي تصحيح لمعلوماتهم.
الكافيه café اللي بيتم فيه تجمع الاعبين كان اسمه “القصبة”، وهو بالفعل اسم المنطقة اللي عاش فيها الجنود والخدم الي بيحموا قصر الحمراء زمان وقت الحكم الإسلامي.
الغريب أنه بالرغم من إن المسلسل من اسمه “ذكريات قصر الحمراء”، إلا أن التصوير في القصر نفسه لم يكن كثير، ولم يتم التجول في كثير من أجزاؤه.
لو انت من متابعين حدوتة ع النوتة، حتلاقي دايما في المقالات جملة ثابتة عن الدراما الكورية، وهي “كعادة الدراما الكورية تتميز بالمونتاج الاحترافي والموسيقى الرائعة”.
الحقيقة إن المونتاج هنا تفوق على نفسه، فالنقلات بين العالم الحقيقي والمعزز، واستخدام الفلاش باك، والتنقل بين المواقع؛ عامل جو من الإثارة حتخليك مشدود ومتابعة كل لحظة، وده كان مناسب طبعاً لفكرة الدراما. أما بالنسبة للموسيقى، فكان ممكن تبقى أفضل.
المسلسل بطولة واحد من أشهر الممثلين الكوريين واللي وصل للعالمية؛ “هيون بين Hyun Bin”، والمعروف خاصة بمسلسل “هبوط اظطراري للحب كراش لاندنج”، ومعاه الممثلة “بارك شين هاي”.
وفي دور المبرمج كان ظهور مميز لـ “تشانيول” المغني بفرقة الكيبوب الكورية “EXO” واللي غنى أغنية مسلسل goblin بعنوان stay with me.
المسلسل برشحه بشده لأنه فعلا مميز جداً لغاية آخر حلقة. إلا أن النهاية كانت مش قد التوقعات، ويقال إن في جزء تاني، وده حايبقى الشئ المنطقي الوحيد لنهاية المسلسل. لكنه بجد واحد من المسلسلات، اللي ماتتفوتش، المليئة بالمتعة والاثاره والتشويق.
وطبعاً اللي عايز يعرف أكثر عن تكنولوجيا الواقع المعزز، يقدر ييعرف اكثر من خلال كتاب “ثقافة الواقع المعزز” العدد رقم 20 من إصدارات المجلس الأعلى للثقافة.
مسلسل ذكريات قصر الحمراء Memories of the Alhambra
اسم المسلسل بالعربي: ذكريات قصر الحمراء
عدد الحلقات: 16
البلد المنتج: كوريا الجنوبية
النوع: أكشن، فانتازيا، إثارة، خيال علمي، رومانسي معاصر، ميلودراما
سنة العرض: 2018
